Wananchi Zaidi ya 17,084 Kunufaika na Huduma za Vipimo Kituo cha Afya Igalukilo Busega

Posted on: May 28th, 2019

Jumla ya Wananchi 17,084 wa kata ya Igalukilo na Vijiji jirani wilayani Busega wanatarajia kunufaika na huduma za vipimo mbalimbali vya afya na kupunguza umbali wa kupata huduma hiyo mara baada ya kukamilika kwa Jengo la Maabara linalojengwa katika Kituo cha Afya cha Igalukilo

Hayo yamebainishwa na Mganga Mkuu wa Wilaya ya Busega, Dkt. Godfrey Mbangali wakati akiwasilisha taarifa ya Ujenzi wa jengo hilo kwa kiongozi wa Mbio za Mwenge wa Uhuru mwaka 2019, Ndg. Mzee Mkongea Ali kabla ya kuweka jiwe la msingi la ujenzi wa jengo hilo.

Pamoja na Jengo hilo Mwenge wa Uhuru umepitia miradi mbalimbali wilayani Busega ikiwa ni pamoja na Vyumba vitatu vya madarasa na matundu sita ya vyoo Shule ya Sekondari Ngasamo, ujenzi wa Jengo la Benki ya NMB na Ujenzi wa Kisima Kirefu cha Maji Kijiji cha Bukabile.

Aidha, Kiongozi wa Mbio za Mwenge wa Uhuru 2019 amekagua kazi zinazofanywa na vikundi vya vijana, wanawake na watu wenye ulemavu pamoja na kuzindua klabu ya Wapinga rushwa katika Shule ya Sekondari Kabita.

MWISHO

KUPATA PICHA ZAIDI FUNGUA KIUNGANISHI HIKI:-https://simiyuregion.blogspot.com/2019/05/wananchi-17084-kunufaika-na-huduma-za.html