Viongozi wa Dini, Siasa na Kimila Washirikishwe Kuelimisha Jamii Kuzuia Vifo Vitokanavo na Uzazi-RC Mtaka

Posted on: May 3rd, 2019

Mkuu wa Mkoa wa Simiyu, Mhe. Anthony Mtaka ametoa wito kwa viongozi na watendaji wa Serikali mkoani hapa kuona umuhimu wa kuwashirikisha viongozi wa dini, siasa na wa kimila katika utoaji wa elimu kwa jamii na kuwahamasisha wanawake wajawazito kuhudhuria kliniki na kujifungulia katika vituo vya kutolea huduma za afya ili kuzuia vifo vitokanavyo na uzazi..

Mtaka ameyasema hayo wakati wa Uzinduzi wa Kampeni ya Uwajibikaji katika kuzuia vifo vitokanavyo na uzazi ijulikanayo kama JIONGEZE, Tuwavushe Salama uliofanyika Mei 02, 2019 Mjini Bariadi.

“ Ni vizuri tukaongeza wigo wa kutoa elimu kwa jamii kuhusu umuhimu wa mama wajawazito kuhudhuria kliniki kipindi cha ujauzito na kuhakiksha wanajifungulia kwenye vituo vya kutolea huduma za afya; viongozi wa dini,siasa na wa kimila wana nafasi kubwa kwenye jambo hili muone namna ya kuwashirikisha “ alisema Mtaka.

Amesema Serikali kwa kushirikiana na wadau mbalimbali wa afya ikiwa ni pamoja na Shirika la Umoja wa Mataifa linaloshughulikia idadi ya watu Duniani(UNFPA) imeboresha vituo vya kutolea huduma, hivyo ni vema jamii ikaelimishwa umuhimu wa kutumia huduma za afya ili kuokoa maisha ya mama na mtoto.

Katika hatua nyingine Mtaka ameishukuru UNFPA kwa namna ilivyosaidia katika ujenzi wa miundombinu ya afya,vifaa na vitendea kazi kama magari ya kubeba wagonjwa huku akisisitiza viongozi na watendaji walioshiriki katika uzinduzi wa kampeni hii kutoka na dhamira ya kuwavusha salama akina mama wajawazito na watoto na kupinga vifo vitokanavyo na uzazi..

Mwakilishi wa Ofisi ya Rais Tawala za Mikoa na Serikali za Mitaa, Dinna Atinda ameusisitiza uongozi wa mkoa kusimamia vituo vinavyotoa huduma za afya za msingi na dharura kuhakikisha vinatoa huduma bora kwa wananchi.

Naye Mwakilishi wa Wizara ya Afya, Maendeleo ya Jamii, Jinsia, Wazee na Watoto, Salome Mwijuma ametoa wito kwa jamii kuendelea kuwasaidia wanawake wajawazito waweze kuhudhuria kliniki muda wote, wapate lishe bora na kujifungulia katika vituo vya kutolea huduma ili wajifungue salama.

Mganga Mkuu wa Mkoa wa Simiyu Dkt. Mageda Kihulya amesema mwaka 2015 watoto 680 walifariki na mwaka 2018 watoto 640 walifariki, wakati kwa upande wa akina mama wanaojifungua vifo vimepungua kutoka 48 mwaka 2015 na kufikia 40 mwaka 2018, jambo ambalo linaonesha kuwa nguvu ya ziada kutoka wadau mbalimbali inahitajika kumaliza tatizo hili.

Dkt. Mageda amesema sababu zinazosababisha vifo vingi vya akina mama wajawazito kama vile kutokwa na damu nyingi wakati wa kujifungua na mkingamo wa uzazi zinaweza kuzuilika, hivyo akatoa wito kwa wakina mama kujifungulia katika vituo vya kutolea huduma kuzuia vifo hivyo, huku akisisitiza watoto chini ya miaka mitano nao wapewe chanjo kuzuia vifo..

Makamu Mwakilishi mkaazi wa Shirika la Umoja wa Mataifa linaloshughulikia idadi ya watu Duniani(UNFPA) hapa nchini, Dkt. Hashina Begum amesema shirika hilo litaendelea kushirikiana na Serikali katika jitihada mbalimbali za kupunguza vifo vya akina mama wajawazito na watoto.

MWISHO

 KUPATA PICHA ZAIDI FUNGUA KIUNGANISHI HIKI:-https://simiyuregion.blogspot.com/2019/05/viongozi-wa-dini-siasa-na-kimila.html