Darasa la Saba, Kidato cha Nne Simiyu Waahidi Kufuata Nyayo za Kidato cha Sita Kubaki Tatu Bora Kitaifa

Posted on: August 24th, 2020

Wanafunzi wa Darasa la Saba na Kidato cha nne Mkoani Simiyu wameahidi kufuata nyayo za kidato cha Sita kuendelea kufanya vizuri katika mitihani yao ya Kitaifa na kubaki katika nafasi tatu bora Kitaifa kama walivyofanya Kidato cha Sita mwaka 2020 ambapo mkoa umekuwa wa tatu kati ya mikoa 29.

 Hayo yamesemwa na baadhi ya wanafunzi wa darasa la saba shule ya msingi Somanda (B ) na kidato cha nne kutoka Shule ya sekondari Simiyu (Bariadi) waliowawakilisha wenzao katika hafla ya kuwapongeza walimu na wanafunzi waliofanya vizuri katika mtihani wa kidato cha sita iliyofanyika24 Agosti 2020 Mjini Bariadi

“Tunawapongeza dada na kaka zetu  kidato cha sita kwa kufanya vizuri kwenye mtihani wao wa taifa tunaahidi kufanya vizuri kama wao;Shule yetu ya msingi Somanda B ina mkakati wa kuingia katika shule kumi bora kitaifa na kutoa wanafunzi wanne katika wanafunzi kumi bora Kitaifa,tunaahidi hatutawaangusha,”alisema Ezra Paulo mwanafunzi wa darasa la saba Somanda.

“ Matokeo ya Kidato cha Sita yametuhamasisha kujipanga zaidi kwa mwaka 2020, kupitia fursa mbalimbali ambazo tunapewa na viongozi wetu zikiwemo kambi za kitaaluma tunapata fursa ya kujisomea zaidi kuliko tukikaa majumbani, tunaahidi kufanya vizuri zaidi ya dada na kaka zetu walivyofanya ikizingatiwa kuwa shule yetu inabeba jina la mkoa,” Sarah Ndamo kutoka Simiyu Sekondari.

Kwa upande wake mwanafunzi Benard S. Benard kutoka shule ya sekondari Binza wilayani Maswa ambaye amepata daraja la kwanza pointi nne, amewaasa wanafunzi wenzake kuongeza bidii katika masomo kushirikiana na kuutumia vizuri muda wanaokuwa shuleni ili waweze kufikia malengo yao.

Naye Mkuu wa Shule ya Sekondari Bariadi, Mwl. Ally Simba amesema siri kubwa ya wanafunzi wa shule hiyo kufanya vizuri zaidi na kuifanya kuwa ya kwanza kimkoa na ya 24 Kitaifa ni kufanya mitihani ya mara kwa mara huku akibainisha kuwa wamejipanga kuwa katika shule kumi bora Kitaifa na kuibadilisha shule hiyo ili iwe miongoni mwa shule maalum nchini.

Akizungumza kwa niaba ya Mkuu wa Mkoa wa Simiyu, Mkuu wa Wilaya ya Bariadi Mhe. Festo Kiswaga amesema siri kubwa ya kufanya vizuri ni mikakati iliyowekwa na mkoa pamoja na utekelezaji wake ikiwa ni pamoja na kuwajengea wanafunzi uwezo wa kujiamini huku akisisitiza kila mdau atimize wajibu wake ili mkoa uendelee kufanya vizuri.

Afisa Elimu wa Mkoa wa Simiyu, Mwl. Ernest Hinju amesema mkoa umetimiza azma yake ya kutoka nafasi ya 10 mwaka 2019 na kuingia nafasi ya  tatu Kitaifa mwaka 2020 na kuongeza ufaulu kutoka GPA ya 3.0443 kufikia  2.894; huku akishauri kuwa ili Simiyu iendelee kufanya vizuri zaidi ni vema  ufundishaji makini uimarishwe zaidi..

Jumla ya wanafunzi 955 walisajiliwa kufanya mtihani wa Taifa wa Kidato cha Sita mwaka 2020 mkoani Simiyu, kati yao wanafunzi watano hawakufanya mtihani na katika wanafunzi 950 waliofanya mtihani, wanafunzi 208 wamepata daraja la kwanza,  507 wamepata daraja la pili, 228  daraja la tatu,  wanafunzi 06 wamepata daraja la nne  na mmoja amepata daraja sifuri.

Pamoja na kutoa shilingi laki moja kwa kila alama A iliyopatikana kwenye somo lake mwalimu aliyefanya vizuri,wanafunzi wawili waliopata daraja la kwanza pointi nne wamepewa shilingi laki mbili kila mmoja;  Mkoa pia umetambua mchango wa aliyekuwa Katibu Tawala wa Mkoa wa Simiyu, Bw. Jumanne Sagini  katika kukuza sekta ya elimu kwa kumtunuku cheti.

MWISHO

KUPATA PICHA ZAIDI FUNGUA KIUNGANISHI HIKI:-https://simiyuregion.blogspot.com/2020/08/darasa-la-saba-kidato-cha-nne-simiyu.html